نصايح الكترونية .. من الوالدة الله يحفظها ..

اليوم حصلي موقف .. ولله الحمد عدى على خير وماصار شيء .. وقتها تذكرت نصايح الغالية ..

أقولكم القصة بعد استراحة بسيطة مع نصايح الوالدة – الله يحفظها – ..
المهم قبل كم سنة .. أول ماشريت الكمبيوتر .. 24 ساعة شغال عليه ..
أطقطق وأفكفك .. وأحوسه حوس ..

وأول ماعلمت الفرمته .. كل يوم أفرم الجهازه … < — من جد ( بس مو كل يوم ) ..

والوالدة الله يجزاها بالخير تنصحني وتوجهني

باختصار مما استفدته وتعلمته من والدتي العزيزة :
- ياولدي ” الصلاة ” ” نظم وقتك ” ” نظم نومك ” ..
- ياولدي ” أشرب بعيد ” عن الكمبيوتر .. الكوب لا يطيح على جهازك ويخربه .
- ياولدي “الأسلاك لاتلذعك ” .. حطها تحت الطاولة ..
- ياولدي ” جهازك علامه مغبر ” .. وبعض المرات أشوفها تمسح الكمبيوتر .. وإذا سافرت ألقى جهازي مغطى بقماش .. – الله يجزاها الجنة – ..
- ياولدي ” الغرفة لاتحوسها ” وتقوم بعض المرات بترتيب الطاولة أحسن من ترتيبي .. ( صدقوني ماعمري في حياتي أقولها رتبي أو صلحي كذا ..)

والله كلامها وأفعالها – الله يجزاها الجنة – درر الكترونية أطالت عمر كمبيوتري ..

ممكن نستفيد من درر أمهاتكم وأبائكم .. أو نصيحة على الطاير لإبعاد جهازك عن المشاكل الميكانيكية ..
آه يالغالية ليت شبابك لحق على الكمبيوتر .. كان أخرجتي  كنوز الكمبيوتر والالكترونيات .. وأبدعتي حق الابداع ..
ولكن ابداعك بتربية عيالك هو الابداع الذي لن ننساه ..

القصة اللي صارت لي اليوم باختصار :
حطيت كوب مويه بجنب الكمبيوتر وبحركة لا إرادية .. طاح الكوب بجنب الكمبيوتر وعطب الفارة .. وماصار شيء للكمبيوتر والحمد لله ..

شكراً لكِ وشكراً لكم ..